اتكلم مع أي حد من جيل الستينات كده وانت نازل كده هتلاقيه بيتكلم عن الوظيفيه الحكوميه انها الحلم
انها الاستقرار
انها الامان من غدر الزمان!
بس انا مكنتش شايف كده خالص
كنت ومازلت شايف أن الوظيفيه الحكوميه وظيفه روتينيه ممله
الحياه في ظل وظيفه الحكوميه حياه روتينيه ممله
"اي حاجه "في ظل الوظيفه الحكوميه هي "اي حاجه" روتينيه ممله!
صراع علي الفتات
تلاقي مناقشه حاميه الوطيس علي الحوافز اللي منزلتش وازاي منزلتش وهتنزلش امتي
وهي الحوافز كلها ٥٠ج
موظفه عنيها هتطلع من كتر العياط..مالك اتشطب عليا هيتخصم كام ..٢٠ج
الجنازه حاره والميت كلب
لا ياجماعه انا مش هيبقي كده
مش هستني الحوافز ال ٥٠ج ..مش هموت نفسي من العياط علي ٢٠ج
انا هسااااافر
ايوه انا مكاني بره
مش بس عشان الفلوس ...اللي هي بالمناسبه السبب رقم واحد
بس عشان أنا مش هقدر اعيش الحياه دي
انا هسااااافر
وفعلا
خلصت الكليه من هنا
وكان نصب أعيني سبب واحد وحيد
السفر
وده لأسباب كتيره كلها بتختلف بتعدد أوجهها ولكن بتتفق جميعا في سبب واحد
الفلووووس
وعلي طول بدأت مرحله جديده في حياتي
هي مرحله" الانترفيوهات للسعوديه"
مرحله كانت بتتميز باني طول الوقت في حاله استنفار مستمر يارايح القاهره
يا جاي من القاهره
والحقيقه اني بحب الانترفيوهات جدا والحقيقه برضه اني كنتي موفق بشكل كبير في الانترفيوهات
فكره اني اقعد مع حد فاكر أنه بيتحكم فيا باسئلته في حين بكون انا المتحكم فيه في باجوبتي
كانت فكره سيكوباتيه مجنونه تجعلني انتشي من فرط اللذه الي في الموضوع
هو فاكر أنه مسيطر وبيوجه الحوار باسئلته لأن زمام المبادرة معاه
وانا باجوبتي واحيانا باسئلتي بتاخده زي المتخدر لمنطقتي اللي عايز اقنعه فيها باني جدير بالشغلانه دي
الفكره انك توصل للهدف الحقيقي من السؤال مش الهدف الظاهري وبعدها تقدر تقلب الطرابيزه وتلاعبه مش هو اللي يلاعبك
لسه فاكر انترفيو ملوش علاقه خالص بالسفر كان لشركه ادويه
لما قالي بيع ليا القلم ده
كان سؤال مشهور اوي إجابته أن لازم نعرف احتياجات العميل الاول
ياعني ماتغلطش وتعد تشرح مميزات القلم في حين هو ممكن يكون مش مهتم ولكن تحط ايدك علي احتياجاته الاول عشان تشوف المناسب ليه أو هتضطر انك توجد الاحتياج ده الاول
طبعا أنا كان مزاجي رايق وقلت العب بيه
هو يقول هتعمل ايه وانا اقوله هعمل زي البياعين في محطه المترو
طيب مانت لو عايز القلم هتشتريه علي طول
لالا القلم ده مش مميز ...هاتلي قلم مميز شويه طيب
وبعدين قولتله هو حضرتك بتشتغل ايه في المحاكاه دي؟
قالي زي مانا
قلتله طيب يبقي بتحتاج الأقلام متعلم ماشاء الله مش محتاج حد يعرفك ياعني
لحد ماقولتله لا ماينفعش اعمل رول بلاي كامله
قالي ماشي وبعدين قعدت اتكلم معاه مش بعرض حاجه لحد ماهو قالي القلم ده بكام قولتله ب ١٠ ج
قولتله عجبك
قالي اة
قلتله مبروك عليك
تمت البيعه
الراجل اللي جنبه وقع من الضحك
تقريبا ماشفش حد تتلاعب بيه زيي قبل كده ولقيت الدكتور بيقولي تحب نمضي العقد امتي ؟
مره تانيه كان لشركه ادويه ..سألني المندوب ولا المنتج ولا العربيه الأهم
قولتله المنتج بعدين المندوب
قالي لا المندوب اهم
ياعني مثلا فولتارين ولا اولفن؟
قولتله اولفن
قالي اهو نفس الماده بس ده فرق مندوب
قولتله لا الاولفن معاه ليدوكايين زياده ثم إن الدعايه الكويسه لمنتج كويس هتخليه يكمل انما الدعايه لمنتج مش كويس هيجي يوم هيتكشف فالمنتج هو الأساس
وبعدين احنا متفقين مش مختلفين
حضرتك باصص لصوره وانا باصص لصوره أكبر منها
احنا بنبص من زوايا مختلفه بس لنفس الحاجه
برضه عرض عليا بعد المقابله العقد
معركه كلاميه عقليه حل شئ فيها مباح مادام هتوصل لهدفك
اول مااكتشف هدف السؤال خلاص!
وانا في خضم معاركي الكلاميه وانترفيوهاتي ومحاولاتي المستميته للهروب من شبح البقاء والركود
اتفاجئ بما يسمى اعلان حركه تكليف الأطباء
وفي حدث مفاجئ متوقع
نقدر نسلم بانتهاء مرحله انترفيوهات السعوديه
لتبدأ مرحله أخري شرسه هي مرحله التكليف
اجد نفسي في ميكروباص الي الادارة الصحية بشربين لاستلام تكليفي اللي هو شغلي الحكومي!
تضاربت الأقاويل عن الفتره التي ينفع بعدها اعمل اجازه تحسين دخل وتسافر
الاول قالي لازم شهر والتاني قالي ٦شهور والتالت سنتين
والرابع بموافقه المدير المباشر
انا كنت قبلت سفر في اماكن كثيره بس أصحاب الرائ والمشوره قالو لازم سنتين بعد التخرج عشان تسافر وتبقي مدير صيدليه
وعليه كان عليا استلام التكليف الحكومي والبقاء فتره الي أن يحين أجل الرحيل
خصوصا اني كنت في مقتبل العمر ابحث عن مكان كبير وشغل كتير وفلوس كتيره في وقت قصير
مكنتش اعرف ان مش مهم المكان كبير المهم محترم والاحسن اشتغل قليل واقبض اقل في سبيل المده تكبر شويه ولكن هتقضيها مرتاح
لسه فاكر تحايل الوالد عليا عشان اخد رقم حد في المجلس المحلي عشان ينقلني مكان كويس وانا كنت رافض في الاول
كنت رافض عشان كنت علي يقين أن الله أكبر من أي حد
وأنه لو مقدرلي اروح مكان كويس هيقدر ده ولو مش مقدر اكيد ليه حكمه وفي صالحنا
وأنه لما نطلب من ربنا مش محتاجين وسيط
بس علي كلا اخدت الرقم وفي نيتي اني مستعملوش وزي ماتيجي تيجي
كل ده جه في بالي بعد مشوار ساعه الميكروباص وقفني قدام باب الادارة بالظبط
الادارة الصحيه بشربين
تقدمت لمكتب المفتشه ناهد بخطوات واثقه وبصوت
اردت أن يخرج مصبوغا بالثقه قلت:-
السلام عليكم
والمفاجاه لم يلتفت الي احد او يرد السلام اصلا!
فترددت قليلا ثم استدرت لأقرب مكتب وقلت :-
لو سمحتي انا صيدلي وتكليفي جه الإدارة هنا
ردت عليا واللي عرفت فيما بد أنها المفتشه ناهد دون أن ترفع راسها:-
الف بركه
واختطفت الورقه ثم نظرت إلي دقيقه تفحصيه كأنها جهاز فحص بالاشعه السينيه
والحقيقه ان نظراتها كانت تفحصيه مرعبه تشعر أنها تخترق ملابسك وجلدك
إن عظامك الان واضحه وضوح الشمس لها
ثم قالت :-حضرتك منين
قفلت :-المنصو...
لكني ندمت واحسست باني تجاوزت حدود اللياقه والأدب حين جاوبت حيث تفاجئت بها تصيح بصوت هادر،:-
بس بقي يابت
ماشي هسكت مفيش......بت؟
مين اللي بت؟
هسكت ماشي يمكن قلت حاجه غلط... بس ايه بت دي؟
وبتدقيق واهتمام اكبر اكتشفت وجود بنت بالفعل تبكي جانبها تبكي بشده
هي مش بس بت لا دي صيدلانيه محطمه..
انتشلني الصوت الهادر مره اخري
انا قلت كفر الترعه القديم خلاص انتهي احنا هندلع
ليرد الصوت باكيا :-ازاي بس ده أنا من المنصورة وعشان اروح.....
قاطعها الوحش الكاسر محمره العنين:- كفر الترعه القديم....اتفضلي يا دكتوووره ايه الدلع بتاعكم ده ...ادي المنصورة واللي بيجي منها
انصرفت الدكتوره البت تلملم كرامتها المبعتره منكسه الرأس ولا اللي لسه ممسوكه في شقه مفروشه
ثم التفت إلي التنين المجنح وقالت قالتلي منين يادكتور
قلت بصوت حاولت أن تبدو فيه الثقه لكنه خرج بصوت عالي متحشرج وعلي وشك البكاء بلا سبب :- المنصورة
لم ترد ولكن انحنت تكتب ثم ناولتني الورقه في برود وقالت:-كفر الترعه الجديد
قلت لها:- ها؟
قالت وحده طب أسرة كفر الترعه الجديد يا دكتور
قلت لها:- كفر الترعه ده ايه مكان ياعني ؟
قالتلي:-امال زمان ؟ ايوه مكان واسمه كفر الترعه
قولتلها :-مالو بقي؟
قالت:- استغفر الله العظيم هو يوم مش باين من أوله
حضرتك يافندم اتوزعت حالا لوحده طب أسرة كفر الترعه الجديد مش القديم ..اي خدمه ..اظن مفهوم؟
وفي لحظه دراميه خاطفه
وجود يوسف ابن عباس الضو بيقول لاااااا
كفر الترعه الجديد لاااا
والقديم برضه لااااا
واي كفر لاااا واي ترعه لاااااا
حضاره سبع تلااااا.....
دكتور!.يادكتووووور
انتزعني الهتاف الجهوري من اللحظه الدراميه الخاطفه
خلصني ياخويا يالا ورانا شغل
حضرتك سالتي مفهوم ولا مش مفهوم من شويه صح؟
استغفر الله العظيم اليوم اللي باين من أوله ده...اة سالت خلصني
لا مش مفهوم ومش هروح ...دكتوره معلش اسمعيني انا اصلا بستلم عشان استقيل ..ماينفعش استقيل من قبل ماستلم ...ملوش لازمه الفرهده
-فرهده ايه يادكتور انا بوزعك حسب الاماكن اللي قدامي مليش دعوه بحواديت الف ليله وليله بتاعتك دي
-تمام ...انا مش هستلم ...سلامو عليكم
وانصرفت وأنا حاسس اني اتهزات...مش عارف في انهي جزء بالظبط من المحادثه بس حسيت بالاهانه
ونزلت درجات السلم ناوي مستلمش حاجه ...يالا بقي زي ماتيجي تيجي
ليه كده يامصر ...انا كل اللي عايزه اني اسافر ..مش طالب منك حاجه ليه بنتبهدل ليه ...ليه عشااا.....
ايه ده؟
فجاه وانا غارق في ليه كده يامصر تنزل صوره هوجراميه لوالدي "خد رقم بتاع المجلس المحلي كلمه"
صحيييييح..ليه مكلمتش سوبر مان ده هرجع لابويا اقول ايه؟
رجعت مره اخري الادارة
ماهو ماينفعش اروح اقول لابويا انا مستلمتش ومكلمتش الراجل زي ماقلت ...ياعني لاحليت ولا سمعت كلامه
وانا الهث طلعت الموبايل اللي كان قد فرد السبب أيامها
واتصلت
جاء الرد سريعا وبيني وبين نفسي اتبسط من واحد قائم بدري رغم أنه مش رايح التكليف ولا هيتوزع
وتم التعارف سريعا...رجل رخيم الصوت تشعر كائنه ملك غير متوج مهيب عارف بواطن الأمور كلها وتم شرح الموقف بأكمله..قلتله تاخد د ناهد تكلمها؟
تفاجئت بصوت عالي جدا في تردده ..صوت فرقعه مع القيق يتضح أنه الصوت ده كان حرفين بس بس خرجو من الراجل بمنتهي الارتياع والخوف اللي في الدنيا
- لاااااااااااااااااااااا....اديني د محب مدير الإدارة ارحم
مش محتاجه فقاقه...انا عارف ليه ...أو بمعني أدق وأوضح عرفت ليه خلاص
وبمتهي الجديه والصرامه وكائن معي علي الموبايل شخصيه سياديه هامه اقتحمت مكتب د محب و....
انتفضت فامامي مباشره د ناهد تقف مواجهه مدير الإدارة د محب وهي تقول بمنتهي القرف:-
وديه راس الخليج
وهو يقولها لا
طيب وديه وحده كوم الشفافه
لا
طيب وحده خرشوف الجنينه؟
لا
طيب وحده ابو لبن؟
لا
ابو لبن؟يععععع
خلاص هو في المستشفي لحد ما نشوف يروح في اي داهيه تاخده
ومضي
سمعت الحوار اللي في حد مغلبهم وبيدور علي داهيه يحطوه فيها
يالا مش مهم
المهم يافندم
دكتوى...تليفون من معالي نائب المجلس المحلي الا دستاذ ...
هات ...ازي ياض يا***"#$#$$#$&&$#
ازبهليت..ايه الألفاظ دي؟ طيب مش قدام ناهد طيب
وانا اللي قلت ركبه هتخبط في بعضها عليه العوض
عايز ايه يا $$$--$####$$$$$؟
مالو الصيدلي بتاعك ده؟اة
خلاص ماهو في المستشفي اهو عايز ايه تاني يا $##@#$#
ايوه الورقه تحت ايدي لسه ماضيها
-انا بقي ...علامه اسمايل كبييييره😁
اولا واضح اني جبت للراجل رخيم الصوت المهيب الملك الغير متوج التهزيق هقفل علي طول الموبايل مش هشكره
ثانيا المكالمه كلها مكنش ليها لازمه لانه مضي قبلها
ثالثا:-انا الصيدلي اللي الادارة مستنيه الداهيه اللي هتاخده!
يااااه شعور لذيذ
انك تبقي متعين بس متهزق
منتصر بس مهزوم
مبسوط بس حزين
مطمن بس خايف
مضيت بالاستلام وخدت جواب الادارة من د ناهد ..كانت مضايقه كائني خدت جواب باستلام التموين بتاعها كده بدلها ...متجها للمستشفي اللي بينها وبين الادارة سور فاصل
تنزل من السلم وتاخد يمينك بقيت في المستشفي
موظفين المستشفي والإدارة أهل وأصحاب وأصدقاء تحس انهم حاجه واحده
خدت الجواب موجهه لقسم شئون العاملين بالمستشفي
ومديره الاستاذ بدر
والاستاذ بدر لمن لا يعرفه فهو شخص عريض المنكبين طويل الافقين اسمر اللون والمسافه بين الفم والأنف بها شعر كثيف يشكل شنب عظيم
شخص بهيئته المهيبه يصلح لإدارة سجن كبير دون أن يطرف له جفن وسوف يكون مرعبا لهم مابالك بقي بحبه موظفين غلابه
أضف اليه صوته الغليظ الذي اذا ما علي فإنك تسمع موجات صوتيه بترددات كالتي تسمعها عند تزاوج الحيتان البيضاء مع بعضها
انت لا تفهم الكلام لانه لا يتشكل من حروف ..هي مجرد همهات بتردد خارق واحد عميق جدا وهادر
لا افهم كيف لشخصيه اسطوريه كشخصيه ا.بدر لا تكون جنبا الي جنب مع هرقليز وسوبر مان وبات مان وباقي أعضاء افينجرز المحترمين؟
لماذا لم يكن ضمن هذا الفريق ...لو كان موجودا لما سمح ل زانوس أنه يطرقع بايده ابدا
اتخيل كنت أعضاء افينجرز متحدين يحاربون دون جدوي.ثم يظهر استاذ بدر بطلعته البهيه هيرتعب زانوس ويخر علي الارض رعبا
يالك من متواضع تترك كل هذا المجد وتكتفي بأن تكون ضمن قسم شئون العاملين بمستشفي شربين؟
ما هذا التواضع؟
كل هذه الأفكار كانت في مخيلتي وانا اقف بكل ادب أمام هذا البطل ليس فقط احتراما وتقديرا انما رعبا
وجاء صوته رخيم عظيم مجلجلا :-
اهلا يا دكتور!
ماهو الرد المناسب ؟ لا اعرف
هل هذه تحيه ؟ ام تحذير من نوع ما؟
هل اهرب الان؟
قلت بصوت خرج بصوت كالصفير :-
اهلا بيك
نظر إليها فجاه نظره تطير منها شرر فوقع قلبي في رجلي
وقلت اهلا بحضرتك
لم تتغير النظره
فقلت اهلا بسيادتك
ضاقت حدقه العين أكثر واكثر
بدأت اعصابي في الانهيار
لكنه قال بصوت مجلل رخيم:-
ايه ده يا داكتور؟
قلت والعرق يتصبب مني لا اعرف اي خطأ ارتكبت واي جرم اقترفته يداي:-.
فيه ايه؟
علا الصوت الرحيم اكتر وشاهدت شنبه يتحرك كثعبان ضحك فوق شفتاه :-
انت من المنصورة؟
يادي المنصوره...الناس هنا بتكره المنصورة ليه بس!!
قلت متوسلا وانا علي وشك الانهيار والدموع علي تنهار علي وجنتي:-
ايوه في حاجه؟
قالي وهو ينظر إلي نظره ذات مغزي:-
لا انا عايز اقول انكم اجدع ناس بس
يااااه اخدت نفس عميق وقد خرجت من الموقف العصيب واسترديت انفاسي اللاهثه وتذكرت سبب وجودي امام هذا الوحش الاغريقي وقلت :-
الله يكرمك انتم الاحسن انا عايز استلم
قال وقد بدأت اعتادي تفقد الادرينالين في شراييني كلما تحدث:-.
تم امرك يا دكتوار اهلا بيك يا مراحب يامراحب
لطيف انت ياعم بدر رغم قساوه المظهر إلا أن وداعت القلب لا تخفي علي أحد
خلص الإجراءات وبدأت بلفه علي الاقسام لانهي إجراءات الاستلام
هي امضاءات لا فائده منها ...انها تحصيل حاصل ....لماذا امضي من الحسابات؟عزيزي مدير الحسابات هل توافق علي وجودي بالمستشفي؟ومالذي يمكن؟مانوع المانع لديه في أن يرفض أن يتكرم بامضائه الكريم؟
وقيس علي ذلك الامضاء من جميع الاقسام الموجوده...انها استهلاك لسعرات حراريه دون ادني داعي
نزيف من الطاقه للمستهلكه من الطرفين
الان ارجع الي شئون الموظفين ليأخذ الورقه الممضيه من جميع مديري اقسام المستشفي.
الأمر اقرب منه الي استفتاء تستطلع فيها رائهم في انضمامك الي مجلس الشيوخ بقي
حسن ..علي كلا انتهت إجراءات الاستلام
حانت اللحظه الحاسمه.اول امضاءه في الدفتر
هي بمثابه عقد استلامك مهامك الوظيفيه الجديده...الان تبدأ مرحله جديده هي مرحله ،"مستشفي شربين"
موكل بمهام الدفتر الاستاذ حماده
اهم شخص في المستشفي اهم من مدير المستشفي
وأشهر موظف وهو من يتودد إليه المحبون وتشرئب الأعناق لرؤيته ويتسابق الي الوده الجميع.فلديه سلطه جباره بوجوده مسؤل عن دفتر الحضور والانصراف ..سلطه تساوي في قوتها امتلاك علاء الدين لمصباحه السحري!
بل قد يفشل المصباح السحري في ما يستطيع فعله الدفتر
أنه خاتم سليمان العصر الحديث
كل عاملي المستشفي مستعدون لبذل النفس والمال في سبيل رضائه عنهم
أنه ملك غير متوج...سلطان بلا عرش
لكن من قال إنني من عبيده؟
من قال إنني اهتم لرضاءه أو سخطه؟
انا شخص الان في مرحله انتقالية ..عابر سبيل ينتظر فرصه للسفر بلا رجعه
لا اريد مشاكل فقط
ولشده دهشتي وجدته ودودا مرحبا فكنت استغرب لذلك ولكني انتبهت لذله لساني بأن لدينا صيدليه
هو الآن يسأل عن ادويه "فياجرا"
إذن المطلوب مني انا امداده بالفياجرا لكي يمضي لي في الدفتر
لم يلزمونا بحضور يومي بل ثلاث ايام فقط ولكن إذا مر تفتيش فهذا الجدول لسه وجود وهو محض خيال وافتراء وبالتالي ف استاذ حماده هو عنصر فعال لتفعيل الجدول هذاا والا ...التفتيش شطب عليك!
انا ضد الرشوه بكل أشكالها وأنواعها والصيغ المختلفة للتعبير عنها
لو مش عايز يمضي مايمضيش مش انا اللي حطيت جدول وقولت اجي ٣ ايام
وعليه
استمر الحال بيني وبين استاذ حماده ...علي شكل ...ايه الاخبار يا دكتور ؟؟؟ مش ناسيك ا.حماده اطمن
وشكرا
الي أن قرر حماده الكشف عن أنيابه تاديبا لي
فجاء اليوم الموعود لاجده علي غير عادته لم يضحك ولا يتكلم لافاجي بتشطيبه في اليوم السابق
-ايه ده ا حماده؟
ايه؟
-ده انا متشطب عليا!!
اة...التفتيش جه امبارح د محمد وشطب عليك
-هممم ...بس د مروه غايبه معايا ومش متشطب عليها!
اة تلاقيهم مسيو
-ود حنان كمان غايبه ومش متشطب !!ده التفتيش نازلي بقي!
صمت
سؤال معلش ا.حماده :- هو الدفتر ينفع يتعدل فيه؟
لاااااا والله د محمد ماتقدرش نحط فيه قلم ...سجن علي طول
-تمااااااام جدا..طيب حضر الدفتر الجميل ده ومعاهم أقلامك وكل حااجاتك كده وحصلني بقي علي النيابه الاداريه ياكبير
سلامو عليكم
استني ...د محمد فيه ايه
-في أن حضرتك عشان تمضيلي عايز منه رشوه ...وعايز ادويه وفياجرات وحاجات...بتشطب عليا وتمضي لزمايلي عشان طبعا خدت منهم فلوس
شوف ياباشا
انا اصلا مستلم عشان استقيل ياعني مش فارق معايا حد ومش فارق معايا حاجه
ممكن اعمل حاجه صح وحيده اني اطهر المستشفي من اشكالك المرتشيه ...اهو ابقي عملت حاجه مفيده
سلااااااام
وخرجت من الاوضه ...وا.حماده بيجري ورايا ينهده في الطرقه
د محمد ...مش كده يا د محمد ....استني بس ...يا د محمد
هنا كان لحقني علي السلم
في نفس الوقت اللي يستعد أهبط اول سلمه كان مدير المستشفي بيستعد يطلع اخر سلمه
وهوبا بقينا وجهه لوجه
مابصليش ولا يعرفني ولا فاكرني ...بس هتافات ا.حماده من ورايا خلته يبص اوي
فيه ايه يا حماده
الحق يا دكتور د محمد الصيدلي الجديد عايز يشتكينا في النيابه الاداريه
مدير المستشفي كان من المدخنين بشراهه وهؤلاء المدخنين بشراهه لا يكاد يريد من غير السيجاره
نظر إلي نظره متفحصه وقالي عايز تشتكينا ليه ياسيدي؟
قولتله عايز مني رشوه يا دكتور
احمرات عينه
وا.حماده محصلش والله يا دكتور
نظر إليا تاني وقالي تعالي علي المكتب
رحت
قالي ايه اللي حصل
حكيت
سكت وحماده بيقول يا دكتور اصل...
قاله اخرس
تروح الادارة تعمل اجازه وتشيل التشطيب
حماده قاله حاضر وانصرف
بصي وقالي وانت
عايز تروح بقي النيابه الاداريه تقولهم عاملين جدول ...الله عليك ياخويا
قولتله هو انا بكدب؟.قالي لا انا اللي بكدب
وضغط زار جنبه
يامحسن اندهلي د مني مديره الصيادله
جت دمني ...قالها
الدكتور بتاعك رايح يشتكينا في للنيابه الاداريه وعايز يقولهم أننا بنعمل جدول!!!
-يا دكتور مش ده الموضوع الي انا رايح ...اصل...
بلا موضوع بلا بتاع
عاجبك كده ؟
قالت لا يا د محمد ازاي بس
قالها د مني
الصيادله كلهم ملهمش جدول عندي طول ما د محمد مشرفنا
وكل يوم يجو ...وبصلي وقالي وطبعا حضرتك أولهم
دفتر الصيادله هيبقي عندي هنا هستناك ٨ ونص
٨ ونص وثانيه هشطب يا دكتور
يالا اتفضلووووووووووو
كان بيتكلم بمنتهي الهياج العصبي ...مستحيل بعد الزعيق والنرفزه دي وطبقه الصوت العاليه دي يكون انسان طبيعي علي الاقل عنده جلطات واانفجارين في كام وعاء دموي علي ما قسم كده
خرجت وبتقيت وجه لو وجه مع د مني
ايه اللي حصل
حكيت تاني
قالتلي وبعدين كده طبلت علي دماغنا كلنا
قولتلها مكنتش اقصد والله
نزلت الصيدليه عرفو الخبر السعيد
الخير علي قدوم الواردين...حرفيا ماكانوش طيقيني
هو انا عملت ايه بس؟؟؟
وللحديث بقيه
مادام في العمر بقيه
0 comments:
Post a Comment